مشتاق لك – شعر شعبي عراقي
جاسم المعموري

 مشتاك الك مشتاك, بسك حبيبي فراك

مشتاك هز روحي الحنين ,

وكلبي ما يهدأ أنينه ,

ولا تعب منه الأنين,

وحسرتي مكسره بصدري 

سنين , وسنين , وسنين

وانطفت شمعة شبابي,

ومثل أوراك الشجر فصل الخريف

صوفرت اوراك عمري,  

الا رسمك ينبض بذيك الاوراك

مشتاك الك مشتاك , بسك حبيبي فراك

حيل حبيتك ولك صدكني حيل 

وعلى فراكك مكدر اصبر 

والدمع بعيوني سيل 

وهم انام الليل ؟ 

لا والله مانامك ياليل

انت تدري شكد احبك, 

وانت تدري كليبي عندك,

وانت تدري بغربتي انت عراقي

وانت تدري الدنيا ظلمه بلايه شوفك ياعراك

مشتاك الك مشتاك , بسك حبيبي فراك

حيل حبيتك واحبك 

والعشق بجفوني كحله

بكلبي نار بروحي شعله

حيلي ..؟ تسألني عل حيلي ؟

حيلي .. ماظل بيه حيل 

ونار عشكك تلهب وكلبي حطب 

وفراكك حبيبي جمر حرَاك 

مشتاك الك مشتاك , بسك حبيبي فراك

كلي شعجب كلبك جلد, بيـَن حبيبي اسبابك

ماكلفت نفسك تجي , وما همتك احبابك

شوكي الك ماينوصف , دمرني حبك ياترف

ولو ما تصدك هل حلف , اسال عليه اصحابك

ضاكت الدنيا الوسيعه , وضاك بيه الوكت ضاك 

مشتاك الك مشتاك , بسك حبيبي فراك  

بسك هجر لأحبابك 

وارجع حبيبي وشوفني

دمرني والله غيابك 

ماهزتك ذكرى العشك 

والشوك .. مادق بابك ؟

موش احنا علمنا العشك معنى العشك ؟

موش احنا عشاك ؟

مشتاك الك مشتاك , بسك حبيبي فراك

29\12\2015

الموضوع السابق متى يا إلهي سيصحو الضمير ؟!

قناتنا على التلغرام : https://t.me/kitabat