لوداع شهر رمضان المبارك
واستقبال عيد الفطر السعيد
........................
ودّعنه شهر الخير شهر الكرامات
بْجاهك يربنه نْشوف بعده المسرّات
.
المفروض يوم العيد ما يبقه كل زعلان
كون النفوس تْطيب وانسامح الغلطان
.
اَدّينه فرض الصوم لبّينه امر الله
اجر الصيام چبير يوم الحشر نلگاه
.
اختمنه كتاب الله بايّام شهر الخير
نسال اله الكون يرحمنه من كل ضير
.
بْعيد الفطر ياناس صفّوها الگلوب
عوفو الزعل والغيظ والعايل يْتوب
.
بْعيد الفطر لحسين يم گبره متجمعين
نرجو العزيز نْريد ينصر حماة الدين
.
بْحسره وْگلب مالوم رمضان ودّعناك
شهر الكرم والخير بالاه فارگناك
.
فرحتنه يوم العيد منِّ الامان يْعود
عجّل فرجنه نْريد مهدينه يالمعبود
.
بْجاها الذي خلّاه عيد وْفرح هاليوم
يْفرح جميع الناس ما يبقه كل مهموم
.
عيد وْفرح هاليوم ومْباركه الرحمن
ريت الفرح للدوم مامونه هالاوطان
.
ندعي بْصلاة العيد بِسْم النبي المختار
خلّصنا يالقهّار من داعش الاشرار
.
شكر وْ حمد لله .. سَهّل علينه الصوم
نْطانه الصبر والعون كل ساعه وبْكل يوم
.
ودّعنه اغله . ايّام . واجمل ليالي
بالطاعه والسجدات نرجو المعالي
.
حلوه ليالي الخير حلوه المناسك
بْساعة سحور الناس ربنه اليبارك
.
ودّعنه شهر الخيرشهر الكرامه
يشهد علينه نْريد يوم القيامه
.
ادعو العزيز اليوم شيل ارفع ايدك
بْجاه الصلاه والصوم فرّح عبيدك
.
فرّج علينه نْريد يظهر ولينه
وْتحكم عله الاوطان دولة نبينه
.
تْصير الارض افراح خير وْ السعاده
والمهدي بيها يْكون راعي القياده
.
نْهني امام الكون محبوب الگلوب
ندعي الاله يثور وينور الدروب
.
فرحانه كلها الناس عيد الفطر حل
هلال الفرح والخير نوره سطع هل
.
بْعيد الفطر لحسين نسعه وْ نزوره
كل شيعي يمّه يريد يِثبت حضوره
.
ونعايد الاحباب كلها وْ گرايب
ننسه الالم والآه فعل المصايب
.
والصايم بْهالعيد ياخذ هدّيه
اثمن هدّيه تكون شوفت وليّه
.
ننسه الزعل والغيظ ساعة فرحنه
كون الگلب مفتوح للي جرحنه
معروفه هاي اتباع بيت الرساله
ماتعرف الاحقاد غيره وْبساله
التعليقات
لا توجد تعليقات على هذا المقال بعد. كن أول من يعلق!