اليوم اشترى خشلوك جهاز ستلايت , الذي كان ممنوعا ايام النظام البائد , اتخذ خشلوك مجلسا مقابل التلفاز , وجلست قربه زوجته العجوز , بينما طلب من احفاده ان يناموا , بعد ان شاهدوا الكثير من افلام كارتون , فهجعوا للنوم في نفس الغرفة .
خشلوك : خلي انشوف الاخبار .
المذيع : الجزيرة دوت كوم .
خشلوك : أي .. الجزيرة صارت الكم يمريكا .
العجوز : يا جزيرة ؟
خشلوك : جزيرة حجي شمهود البدوي .
العجوز : أي والله او ضاعت منك الجزيرة يحجي شمهود ! وصارت جزيرتك لعبة عد الاجناب .
خشلوك : جا مو الاجناب سووها جنة !
نهض علي ليقول .
علي : الجزيرة دوت كوم , الموقع الالكتروني للفضائية ... ياجزيرة شمهود ... يا امريكا .
خشلوك : اسكت ونام ... انت شمعرفك بالسياسة ! .
وتابع خشلوك اول خبر , وكان عن فلسطين .
خشلوك يقرأ : ذكرى الكبة
العجوز : يا كبة !
خشلوك : راح ايوزعون للفلسطينيين كل واحد كبة .
العجوز : بالكمية ! بس وين تكفي !.
خشلوك : ما عدهم كمية .. وينطوهم وياها لفة فلافل .
العجوز : جا بس كبة يوزعون .
خشلوك : اليوم كبة .. باجر طرشانه ... عكبه فاصوليا العجوز : خوش ريس ريسهم نهض علي ليقول : جدي ... ذكرى النكبة .. يا كبة !
خشلوك : ولك انت شمعرفك بالكبة والنكبة ! شو روح نام واسكت !
فكان الفاصل الاعلاني , وتابع خشلوك الاعلان , حيث كان شخص يستعمل بخاخا يرش به جسمه .
خشلوك يقرأ: مزيل العراق .
العجوز : شنو يريدون يزيلونه .
خشلوك : أي .. كل واحد عراقي يلكونه بالخارج يرشون عليه من هذه البخاخ ويموت .
نهض علي : جدي ... مزيل العرق مو العراق .
خشلوك : ولك انت شمفهمك بالسياسة ! ... انطمر واسكت ! .. ولك جا هو مزيل العرق يحتاج اعلان ... الناس اتروح لحجي مناحي العطار .. ويخلط الهم شب وشناذره زركه .
العجوز : خلي انشوف الحيوانات .
تجول خشلوك بين القنوات الفضائية , حتى عثر على احدى القنوات تعرض تقاريرا عن الحيوانات كالاسود والثعالب وغيرها .
خشلوك : شوف امريكا اتجوع الاسد ... وتشبع الواويه !
العجوز : ليش ؟
خشلوك : مو الاسد ما يطخ الراس لا لامريكا ولا لغيرها ... والواوي يذل نفسه لامريكا .
حاول علي النهوض , لكن خشلوك بادره .
خشلوك : ولا كلمه ... انت شمعرفك بالسياسة ... نام واسكت .
علي : شلون انام والتلفزيون صوته عالي ! ....
الموضوع السابققناتنا على التلغرام : https://t.me/kitabat
.jpg)
