حجنجلي بجنجلي حاير عراقك ياعلي
وجيه عباس

حاير عراقك والنبي صارت الوادم لبلبي

العالِمْ يساووه إبْغَبي والأسطة صاير سربلي

***

حاير مثل زاير جبر من بطن أمّه للكَبرْ

ماشبع روبة ولا تَمُرْ وتاليهه ولية ينولي

***

حاير عراقك بالذبح كل ساعة يتذكّر جرح

مثل اليرشّه بالملح صخله ويسمّيهه طلي

***

واكَف ومايضرب سره ومايدري بالصار وجره

الكَدام صاير ليوره والوره صاير أوّلي

***

صاير مثل كاكه حمه لانفع روحه ولاحمه

بالفرن نام وماحمه من صعد فوكَـ الجبلِ

***

حاير عراقك بالوَضِعْ والّي لِزَكـْ ماينشلع

كل واحد يدوّر رَبُعْ بالمفرد يبيعك صلي!

***

حاير يشد بياكِتِرْ كل واحد امزيّن صِفِرْ

الكَرعة تهلس بالشِكَرْ والاكَرع يدوّر جلي!

***

زدنه بصبرنه ومانكَصْ والدمع بعيوني خَلَصْ

خيّر طلع حسنة ملص وفنّك تعارض...تبتلي

الموضوع السابق صِراطُ الحُكم!!

قناتنا على التلغرام : https://t.me/kitabat