اختفاء الكعكة العراقية , في ظروف غامضة.
عباس طريم

كومي اتوزري , اودكي يبدريه

 

حجتهه, ابكل صراحه البرلمانيه

 

اتكول :الكيكه بس انه فقط , خيه 

 

وما نطي الشعب,لو رادله اشويه

 

+ + +

 

حكومتنه , حكيمه وتشبه  البهلول

 

ولكل مشكله اتلاكينه , عدهه احلول

 

واكثر شي , عدالة سيدي المسؤول

 

الخصص للشعب , صفرين بالميه.

 

+ + +

 

الكعك , خيه انخلق بس  للسياسيين

 

واحنه .. انكتب عالكصه نظل حافين

 

ما سمحولنه .. انشوف الكعك بالعين

 

والمد عينه ,  غلكوهه   ابيساريه .

 

+ + +

 

اجانه , الجان جدي ايكول : متعافي

 

وكال : الشعب .. افضله يظل حافي

 

ومن ايشوفنه .. ايطنش ايظل غافي

 

واحنه .. انقسم الكيكه العراقيه .

 

+ + +

 

كالو كيك ماكو , اهدولهم سياح 

 

هم مثل الكعك والكيك, بيه املاح

 

شخير من اكل ,وين الطواريء صاح؟

 

السياح انكلب , قنبله الذريه.

 

+ + +

 

خيه الشعب واعي ويعرف احكوكه

 

وحالف , اله كيكه يضيف لريوكه

 

زنود الست , مع ملبس, ومدكوكه

 

ما يرضاه شعبنه , اوروح دبيه .

+ + +

كيكتنه يخيه , اتكفي كل الصين

 

بس شنسوي,اجونه ارجال متحزمين

 

لا كظهم عرف , لا مستحه , ولا دين

 

الكيكه وما كفت , بلعو الصينيه .

 

+ + +

 

خيه اتوزري , وكومي الطمي اوياي

 

وخل انروح نشكي , لمحكمة لاهاي

 

انكلهم ساكتين اعله المصايب [ واي ] 

 

شعبنه انكرط , والكرطوه الواويه .

 

+ + +

 

ايكولون : المواطن حكه راح اوشت 

 

انصحو الشعب , خلوه يكعد ويسكت

 

صادرنه الكعك , والكيك , والبسكت

 

وخلينه الهوه ,  وما  جسنه الميه .

 

+ + + 

 

ظالم راح خيه ,   والأجو   ظلام

 

حولوه الوطن, لسخام فوك الطام

 

من يوم الاجونه ,اشتغلت الافلام

 

من تاليف وإخراج , الحراميه.

الموضوع السابق الأستاذ الدكتور خضير درويش : الشعرية هي الفيصل بين الشعر والنثر

قناتنا على التلغرام : https://t.me/kitabat