ارتدى راجي سترته , ثبت العقال على راسه , وازن نزول الليشماغ على كتفيه , وهمّ بالخروج .
راجي : ام سعد .. شجيب الكم غده اليوم ؟
ام سعد : والله يبو سعد .. من زمان ما كلنه لحم .
راجي : ابشري .
اغلق راجي الباب خلفه , وانطلق يسير بخطى متزنة , حتى قابل خريجان .
راجي : شلونك يخوي ابو خيري ؟
خريجان : ماشي الحال .
راجي : وين بيها ؟
خريجان : للسوك .
فسارا حتى دخلا السوق , فقصدا القصاب .
راجي : بيش الكيلو اليوم ؟
القصاب : 15 الف
ادخل راجي يده في جيبه , اخرج عملات ورقية , فعدها وقال .
راجي : عندي خمستالاف ... ما بيهن نص كيلو .
خريجان : خلي انروح انشوف المجمد .
تابعا سيرهما , حتى وصلا محل بائع اللحوم المجمدة , وقع نظر راجي على الدجاج البرازيلي , فقلبه , وانبهر بحجمه .
خريجان : هذه برازيلي .
راجي : بس خوش دجاجة ... سمينه .
خريجان : انه قريت بالانترنيت .. يكولون الدجاج البرازيلي بيه مرهونات
راجي : الله يستر ... مرهونات !
خريجان : أي يعلفون الدجاج بالمرهونات ... وهاي المرهونات تسمنّ الدجاج .. وتبقى بالدجاج .. ومن ناكله تدخل بجسم الانسان .
راجي : انه اخوك ... جا هاي الدجاجة اشماله ما تعرف المرهونات ؟
خريجان : اشمدريها الدجاجة ! ... يخلطونه بالعلف
انصت البائع لحديثهما , فبادرهما بأبتسامه .
البائع : قصدك هرمونات و مواد كيمياوية اتسمن الدجاج .. بس هاي المواد تبقى بلحم الدجاج .. وبالتالي تدخل بجسم الانسان الياكلها...
راجي : انه اخوك ... وتمرض !
البائع : هاي دعايات .. وحجي ماله طعم
خريجان : والله انه امصدك ... ما اشتري الدجاج البرازيلي .. شو ناوشني دجاجتين الكفيل
راجي : الكفيل .. بيش الدجاجة .
البائع : ابخمسة
راجي : اجيت فيت .. انه عندي بس خمسة ... هاك اربعه ونص بس ... ونص اشتري بيه خضرة ... خريجان .. الخضرة هم بيها مرهونات ؟!!
التعليقات
لا توجد تعليقات على هذا المقال بعد. كن أول من يعلق!