الأباحية.. وسلامة (الأعضاء)!!
فالح حسون الدراجي

المقالات لا تُعبر عن وجهة نظر الموقع، وإنما تعبر عن رأي الكاتب.

 لا شك أن القرارات التي صوت عليها مجلس النواب يوم الإثنين كانت محيرِّة، ومُربكة.. فهي عبارة عن خلطة كاريكاتيرية غير متجانسة، (يعني شي ما يشبه شي بيها)..!!
 وإذا كانت هذه القرارات قد مرَّت على البعض مرور الكرام، أي مرت بسرعة، فإنها مرَّت عليَّ مرور اللئام.. أي أنها تأخرت كثيراً عند باب عقلي، حتى رحت أقلبها، وأتفحصها، ثم (أمخمخها) دون ان أصل الى نتيجة، توضح لي بعضاً من دلالات هذه القرارات الخطيرة..
لذلك إتصلت بصديقي صاحب اللسان الباشط، والقلم اللاذع وجيه عباس، لأسأله عن رأيه في هذه القرارات السنسكريتية، عسى أن يشرح لي صدري ببعض من اجوبته المميزة دائماً.. لأننا - ولا أكشف سراً في ذلك- (نتونس) بمثل هذه الموضوعات الفكهية خصوصاً سيد وجيه، فهو يعتبر هذه المواضيع بمثابة (عيد وجابه العباس النه)..
وقبل ان أسأل سيد وجيه عن رأيه في الموضوع، صاح بصوته الممزوج بضحكة شامتة:-
 ها خويه أبو حسون، سمعت بقرارات الجماعة اليوم؟!
 ضحكت، وقلت في سري:( إنلاصت والحسين.. أبو علاوي عاجنها وخابزها قبلي)..
فقلت له: أي والله خويه سمعت بيها، وجاي اخابرك عن رأيك بالقضية؟
فقال لي: يا قضية؟
قلت له : قضية تحرير موزمبيق.. يعني ياقضية.. غير قرارات مجلس النواب اليوم؟
فقال بصوت عال: ليش بعدك ليهسه ما قاري مقالتي .. مو دزيتها الك قبل ساعتين علمود تنشرها على عدد باچر..
قلت له: والله باچر ما عدنه إصدار أبو علي، الشوارع اليمنه مقطوعة بسبب المشاية !!
فقال : أوكي خويه هاي هيه، خليها على يوم الأربعاء مو مشكلة .. بس أريد أسألك شنو رأيك بقرار السيطرة على الضوضاء.. قرار حكيم، وشاكر مو.. يعني بشرفك شلون سليم الجبوري يريد يسيطر على الضوضاء.. شلون بلله يسيطر؟
قلت له : بسيطة ..
قال: شلون بسيطة ؟
قلت له: ينصب سيطرة مشتركة مثل هاي السيطرات المشتركة اللي تچلب بالناس چليب، ويمنع الضوضاء.. وبهذا تتحقق السيطرة على الضوضاء..
فقال السيد: والله يا فالح غلبتني .. لأن بصراحة ما مخلي هاي السيطرات على بالي..
قلت له: الآن أنا أسألك سيدنه.. تصويت مجلس النواب على قرار منع الأباحية، وقرار السيطرة على الضوضاء، تصادف مع التصويت على قرار (سلامة الأعضاء) في نفس اليوم.. فهل هناك علاقة بين  (الأباحية) و(الأعضاء)، وعدم الضوضاء (يعني يصير الشغل سكتاوي)؟!
فضحك السيد، وقال: هاي وين رحت أبو حسون.. عمي ترى الأستاذ سليم الجبوري مو قصده حماية وسلامة (الأعضاء) اللي أبالك، بحيث سويت ربط بينهن وبين الأباحية وعدم الضوضاء، أو السكتاوي كما تقول.. لا خويه لا.. الأعضاء اليقصدها الأستاذ الجبوري أعضائه هو .. وقبل ما يصير عندك التباس آخر، أقصد: أعضاء مجلس النواب مو أعضاء الجبوري حتى لا يروح بالك بعيد..
بإختصار – يكمل سيد وجيه – البرلمان ما يريد أباحية، ولا يريد ضوضاء، يريد فقط حماية وسلامة أعضائه.. والمسؤول عن هذه حماية الأعضاء هو سيادة القائد العام للقوات المسلحة..
فقلت له ضاحكاً : يعني راح يصير رئيس وراء الصبح، وحماية ( للأعضاء) بالليل؟
فضحك السيد، وأغلق الهاتف قائلاً :
خويه أبو حسون خليني أطلع تقاعد.. وفدوة أغديلك لا تبليني!!

الموضوع السابق كيف يكون الحب حقيقة

قناتنا على التلغرام : https://t.me/kitabat