يوم من الأيام، عباس مرابط على الساتر، فاقترب منه أحد الإعلاميين. قبل أن يصل إليه، گله:
«خوية، تره مالي خلگك، كفيلك العباس أبو فاضل، وما أريد أحچي. خاف إلك نية تسولف وياي، أني من أهل ميسان، وبقضاء الميمونة أهلي، وعمري سبعطعش سنة، والبندقية مالت جدي، والنعال مال خالي، وحذاء ما عندي، والجواريب مال ولد نزل مجاز لأهله وعايفهن يمي. بعد عندك شي؟».
فقلت له:
«لهاي الدرجة أنت ضايج مني؟!».
فقال، وهو يجلس على الأرض:
«لا والله، ما ضايج منك، بس أني مريض، والحمزة أبو أحزامين، والكلام مو زين عليه، وبردان كلش من رجليه، وأني بالأساس بيه روماتيز».
هذا الكلام في منطقة النباعي في حزام بغداد. كانت منطقة ميتة، كل شيء فيها مهجور ومخيف، حتى معامل الحصى والعجلات متروكة، وأعمدة وأسلاك الكهرباء متساقطة.
وفي تلك الدروب الترابية التي تتفرع من عدة زوايا، جلست إلى جانب شاب صغير لم يخطّ شاربه بعد، والبندقية تبدو كبيرة بيده. وكان الجلوس على مكان أشبه بالتل الترابي لطريق يتصل بمناطق الدواعش، تم قطعه بالتراب.
بعد أن قال الشاب عباس: «أني بردان»، أمسكت قدمه، وأردت أن أقيسها بيدي؛ لعلها تأتي على قياسه، فأعطيه حذائي.
فقال لي:
«وروح أبوي، ما آخذها منك لو تصير مدرعة مو حذاء! من كلّ وعقلك آخذ حذاءك وأخليك بردان؟ أني بعد شوي، وي ظلام الدنيا، ألف رجليه بوصلة، وبحيل الله أدفه».
فشلت كل محاولاتي في إقناعه، فقال لي، وهو يبحث عن كطف جگارة في الأرض:
«خوية، أني طبعي طبع دراويش، لا حسبالك طفل وما خاط شاربي، وأني من أجيت لهنا تره بعقل، مو عاطفة!
وأني بالميمونة، بولايتي، عندي كاروبة أشتغل بيها، أنقل حلال وزرع، ومعيّش روحي وأهلي. ومن صارت حرب داعش، حلمت حلم، چن جماعة ماخذين كاروبتي وحاطين بنات السلف ويصيحون: للبيع بلاش.
فزّيت، سولفت الحلم لجدي، صفگ بيده جدي حيل، وأمي گالت: كاروبتك، يعبوسي، بيها عطل.
وثاني يوم هم حلمت نفس الحلم، وأبوي المرحوم أجاني بعالم الطيف، وگال: بويه عباس، روح للجبهة، تره خواتك وبنات عمك وبنات السلف ينباعن صدگ إذا ما تروح.
گعدت الصبح، سولفت الحلم. أنطاني جدي البندقية، وأمي أنطتني أوزار أبوي، هالتشوفني محزّم بي، وهاي صار لي شهرين ما شايفهم».
تيبّست الكلمات في فمي، وأحسست بعطش شديد رغم برودة الجو، من هذا الصبي الذي ترك أهله وكاروبته، ونسي مرضه، وجاء للساتر في أرض موحشة.
أخرج عباس من جيبه كيسًا صغيرًا من التمر ووضعه أمامي، وجلسنا نأكل سويّة.
فقال لي:
«أنت تكتب، مو شفت بيدك دفتر؟».
فقلت له: «نعم».
فقال لي:
«خلي أكمّلك سالفتي، خاف تريد تكتب عني.
أني بالرابع أدبي، وأحب بنية من طوايفنا، بس أبوها شيخ، وما أنطوها إليّ لأن مريض، وبقيت أحبها. وبيوم التحقت، صح عندي رقم موبايلها، بس أبوها حلّفني ما أخابرها وأگطع علاقتي بيها، فودّيت أمي علمود تگلها: تبري لي الذمة؟
تدري شگالت لأمي؟
گالت لأمي: گولي لعباس، بيناتنه العباس، حلمت بي عريس وماخذ وحدة تخبّل وداير وجهه عني، وگوليله: خوية، مبري الذمة».
لا أعلم لماذا بكى عباس، رغم أنه كان يتكلم ويضحك ويأكل التمر، لكنه بكى بحرقة شديدة، ثم قال:
«خوية، البنية ماتت… اتكهربت وماتت، وحتى ما حضرت فاتحتها، لأن صار علينه هجوم قوي بالمفخخات، وما رحت».
سلّمت على عباس وودّعته. وبعد أربعة أشهر، حضرت احتفالًا في النباعي لتأبين الشهداء، وبين صور الشهداء الـ23 كانت صورة عباس، وهو يبتسم، وبيده بندقيته وإزار أبيه، ولكنه في الصورة كان حافي القدمين.
نعم، حافي القدمين.
لو كنت أملك ما يعينني على ذلك، لعملت من هذه القصة فيلمًا سينمائيًا يحكي قصة وطن خذله الجميع، وهوى إلى الأرض، وانتشلته ثلة عجزت وعقمت نساء الأرض أن يلدن مثلهم، وبتضحياتهم رجع شامخًا.

التعليقات
لا توجد تعليقات على هذا المقال بعد. كن أول من يعلق!