|
اشمال حظ اعناد يركض للامام
وحظي عكس اعناد يرجع
ليوره؟
+
هذه شي مقسوم , من رب العباد
لو عمل شلموده عمتي
ياتره ؟
+
عمتي تأخذ خيره , وتحضر الجان
وتشتري العذراب والشر
مشتره
+
رحت .. اكصد حجي كاطع اشكي ليه
وفصلت كل ما حصل لي
وما جره
+
وكتله : نايم حظي .. مثل اهل الكهوف
يشخر , ورجليه وديه
امبتره
+
حظي .. شالوه اونفوه , بره البلاد
والبخت سحكو عليه
بالقندره
+
والامل .. منعوه حته امن المرور
وراحله .. الشرطي زبون
اوحذره
+
ابطانة اجيوبي نظيفه , اوتستغيث
ودومهه .. اتغني ابقصيدة
حايره ]
+
كال : ياحافي تبشر بالجنان
هناك .. كل حافي .. الاله
ايقدره
+
ابني , كل مفلس اهناك ايقدموه
والغني ابيوم الحساب ايظل
وره
+
ابقه كاعد عالحديده , اوما عليك
اهناك .. كل صعبه وشديده
اميسره
+
المفلس ابدنياه , اوحافي ابهاالحياة
ايصير اغنه الناس يوم
الاخره
+
اصمد .. وخليك صابر كالحديد
وصلي اوسبح الربك
واشكره
+
ابني ياشلمود , عيش اعله الكفاف
واكل خبز اوجاي بس
لتكثره
+
دير بالك .. تكرب الاكل الدجاج
واللحم مسموح الك بس
منظره
+
خلي بطنك .. فارغ اليوم الحساب
وبالك .. الاكلات طيبه
اتجرجره
+
وصاح حجيه الغده .. اوطب الكباب
اوخبز حار , اوهسه خابزته
المره
+
اوسمجه مشويه , تدور عالبخيت
اوصحن بيه اجمل دجاجه
امحمره
+
اوتمن اوتشريب وأنواع العصير
اودولمه اتخبل , اوكبه
امدوره
+
والفواكه .. حاضره ابكل الصنوف
كلهه مغسوله غسل
وامكشره
+
الحجي يثرد .. وانه اباوع عالثريد
لحد ما خلص عليه , عن
اخره
+
قدر محتوم , ايده نزلت عالصحون
وجابهن.. لحسا وبلعا
بالسره
+
ظلت الصينيه تصرخ , يامغيث
اتصيح شيلوني لياكلني
تره
+
وهجم اخر جوله .. عالماي الزلال
ومن شبع .. تمتم بشافيه
اوقره
+
ردت بس ايكلي : سمي , مد اديك
وعادة المضيوف , ضيفه
ايقدره
+
أيست .. من مسح كل هذه الثريد
اوحط عطر بيده اعله جسمه
اوعطره
+
كتله : اريد الفرج من رب العباد
بلجي حظي الما نفعني
ايغيره
+
وبلجي ربي ايعيد للحظ الحياة
ويدفع ابعبده الذليل
اوينصره
+
انته تاكل سمج , وأنواع اللحوم
وتنصح ابها الناس .. تاكل
بس ذره
+
انته نازل دوس , بالوز والدجاج
وبالخبز يابس , الغير
اتبشره
+
انته عود اتكودني الأرض النجاة؟
لا حبيب الروح , حجيك
قشمره
+
انه .. اريد اكتب شعر , ليل اونهار
بلجي رب الكون اكسر
خاطره
+
وارد اعاتب بالشعر , رب الجلال
واطلب الغفران , وارجو
المعذره
+
ليش ميزانية الكل .. بالحياة
امتلتله اومليانه , وانه
امصفره؟
+
وليش كاع الناس , مليانه ابخضار
اوكاعي من دون العباد
امحفره؟
+
اوليش ظلمه وظالمه اوياي الحياة؟
اوليش وي غيري, الحياة
امنوره؟
+
االدنيه ما كصرت , وي كل العباد
ليش بس وياي , حيل
امكصره؟
+
اوليش حته البيسكل ويه الصباح
من اريد اطلع.. اجروخه
امبنجره؟
+
اوليش كاطع , ياكل ابمطعم طبيخ؟
وانه كل يوم اليمر , ماكل
|
