|
حبيبي احليو مثل اهلال جنه
قليل الينحجي اوينكال
عنه
+
عنده اعيون تجرح مثل السيوف
وقوام ايشابه الغزلان
جنه
+
منه ومن جماله اتغار الطيور
ومليكات الجمال اتغار
منه
+
منضد .. جنه در ايذوب الكلوب
وابيض من حليب البقر
سنه
+
اسنونه امعدلات ابخيط شاهول
تعديلات ربك, موش
بنه
+
فريد الاطرش ابفلم المحبين
تذكر هالجمال وكام
غنه
+
من اصفن , واتذكر محياه
تسيل ادموعي واتذكر
وطنه
+
واتذكر صباي ولعب الطفال
ومراجيح المحله , واجر
ونه
+
واعاتب هالزمن واتسائل اوياه
واكولن وين صرنه , اوين
جنه
+
مثل اي مغترب , ما ينكضي الليل
اذا داخل حسن , ياليل
غنه
+
مثل اي مغترب ,من دون البلاد
ايشوف ابلاده بس , بالكون
جنه
+
طلعنه امن العراق ابطرك الجساد
وبعد ايام للمهجر
وصلنه
+
وعرفنه اهناك ..معنى اتعوف الوطان
وشعرنه ابحينه من الوطن
شلنه
+
وبجينه ابلا وعي ,من واقع الحال
الهد اديارنه وشتت
شملنه
+
تذكرنه العراق ولمة الناس
بساعة ضيجهه , اوذيج
المحنه
+
ونسيناه المثل ..[ ما تبجي الرجال]
وصدك بينه الضعف, بالغرب
ظنه
+
وتمنينه نعود الارض الجداد
اومو دوما يفوز اللي
يتمنه
+
لعب بينه لعب من دون هالناس
ونثرنه ابكل ارض شتله
زمنه
+
انموت ونحتيي وانعود كل يوم
مثل معلول والكبره
تعنه
+
صحيح الكهرباء اهناك تقسيط
وصحيح المجتمع كل يوم
رنه
+
وصحيح الزايره وي النساوين
كل صبح اليمر عالناس
دنه
+
وصحيح اعله الفصل كل يوم طكات
الما يدفع.. عدو يصبح
كانه
+
وصحيح الناس كل واحد الليلاه
عزف معزوفته التطرب
وغنه
+
وصدك كل يوم صوت الانفجارات
يون .. اونسمع امن بعيد
ونه
+
وصحيح العرك بالكلات , ملوه
ولا بذيج التواثي العد
اهلنه
+
كل واحد قذيفه اوبرنو اوياه
وبس انكله بز , انموت
كنه
+
وصحيح الفصل صاير بالملايين
وبيهم كوه للشر
ايتعنه
+
لكن الوطن عايش بالكلوب
شما نرحل , ونبعد حيل
عنه |
