• القسم الرئيسي : ثقافات .
• القسم الفرعي : ثقافات .
• الموضوع : مخلوق من ياطينه .
• الكاتب : ابو ماجد الزيادي .
مخلوق من ياطينه
|
|
يمشي وتعـثّر واسـتحى وي ماسوى تلاگينه أسم الله گتله بلا وعي وعيني التگت وي عينه *********** أمشي چنت يم الجرف مستانس بزود الماي وآنه اغض من البصر لو بشر يتلاگه وياي بس من عثر گوَه التفِت ماچـنت متعـمّد هاي من شـفته گلت شهالبشر مخلوق من ياطينه ********** ياطين من عنده أنخلگ وشهالاوصاف التبهر طـبعـاً شــبالغ بالـوصف يسـتحق هـذا واكـثر ممشاه حلو ومابيه خلل بس صدفه واحد يعثر وبدمه خفّه وبـيه ملح وتصـيب نظرت عينه *********** نظراته تسحر من يصد وتصيب كلمن شــافه ومن يمشي ممشاه متّزن چنّه مشي الكشّافه شرد احچي كل مابيه حلو مملوحه كل اوصافه ولو ردت توصفلك حِسن من عنده تاخذ عـينه ********** عِينه انت تاخـذ للوصف مـنّه وتسولف عنّه بيه جاذبيه ومبتهج وتگول يضحك ســـنّه بـس ماتشـوفه بكل وكت ودّك تجرّب منّه بهذي الملامح والعمر توهن بدن عشرينه ********** گتله انت من هالمنطقه لو اهلك شويه ابعاد گا ل آنه اهلي بكل كتر بصره وسماوه وبغداد ذي قار ديرتنه گبل بـس آنه أخوّالي أكـراد گتله اصبر اشويه انتضر تدري حستها اعلينه *********** گال آنه من كسره وعطش بس نسكن ارض الحلّه وبالقادسيه احـنه گـبل عدنه مـضيف ودلّه وعـدنه أهل يم مندلي وغـمّـاس اضن تندلّه هم بيه گرايبه وعفـچ بيه ناس منـّه وبيـنه ************ عندي گرايب بالمجر يم العماره وبالكوت مابيهم العنده بخل عن ربعه ياكل بسكوت وعدنه ربعنه بكربله ماأنسى حبهم للموت يحچون عجمي وبشتوي بس مانسو ماضينه *********
مانلّلخ وعمـّو يَوَل أدليمي وي كلداني شلقصّه وي خايب وِلك متعوّد آنه ألساني بالتركماني اعرف أغا وعرف حچي السرياني بتلكيف يحچون أبقلا يمكن اسـم تاچـينه *********** اخبط الچا وي اللّعد وحچي چنت مصلاوي بـس ماتميز لهجتي منالنجف لوحلّاوي وجيراني نفس المنطقه آثوري وي منداوي مانحچي ابد بالتفرقه كلمن يمارس دينـه ********** بخوى اگولن بالقسـَم واحلف وداعة عمّو وجيرانه بحي العدل كاكا وزهير وشمّو وام ناصر تسوي غدا وتگول خاله ألتمو تجمع اطفال أهل الطرف نلتم سوى تغّدِينه *********** عدنه سـوالف تختلف بالعربي نگول أنضر أتنوّع وشوف شبعد باوع وعاين وخزر أتفكّر ودحّج يَوَل وگولت اطمّش بالسر هذي سـوالف ديرتي واعتقد كللش زينه ************ ديرتنه حلوه مرتّبه بيها جبال أووديان الرزازه بيها بكربله ودربندخان ودوكان ساوه تعال ألها العصر واطلع لبر السلمان تلگي ربعنه بكل كتر واطباع عدهم زينه *********** من السماوه آنه الاصل اجدادي ذوله وعمّي وهذي الولايه منالزغر حبها سرا وي دمّي بيها اهلاً شـلونك بعد يامرحبه اگعد يمّي مشروعه من امدح هلي هاي الصفات البينه ********** ناس احنه اهل غيره وصدگ ماعدنه بيهم لوله واجبنه صيحات الحزن ونيازنه الهلهوله ولو شـفـنه وادم أگبلو ماگلنه ياهم ذوله ننطيه ولو ماعدنه ضل للعاني كَاصد لينه ********** گتله آنه يعجبني الوصف هذا الحچيته بربعك ومن هذا صرت آنه اعتقد هم انت اريحي بطبعك بـس احنه مـنّاه نفـترق طبعاً بعد ماتبعك هذا الحچي أيامه جزن عمري بتوالي سـنينه *********** هذا الحچي أيامه جزن عمري بتوالي سـنينه |
|
|
• المصدر : http://www.kitabat.info/subject.php?id=22191
• تاريخ إضافة الموضوع : 2012 / 09 / 21
• تاريخ الطباعة : 2025 / 03 / 15