• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : يحسين هاي مصيبتك .
                          • الكاتب : سعيد الفتلاوي .

يحسين هاي مصيبتك

يحسين هاي مصيبتك

بيها الخلك حزنانه

بآلام تصرخ شيعتك

تبقى النجم بسمانه

...............................

هيهات تنذل شيعتك

هيهات منّه الذلّه

وبصوت واحد نادتك

انت الاصل والملّه

انريد نرفع رايتك

عالعارض وبي علّه

ونگلّه تخسه علّتك

هذا السبط مولانه

يحسين هاي مصيبتك

بيها الخلك حزنانه

................................

ماتطفه نارك للابد

رغمن على عاديها

واليحكم الواحد احد

وانت التظل عاليها

بدمانه نكتب هالعهد

ارواحِنا نفديها

ونخلِّد احنه ثورتك

ندريك ماتنسانه

يحسين هاي مصيبتك

بيها الخلك حزنانه

.................................



يبقى لطمنه على حسين

عاده وفِنَى اليلغيها

تفتي بحُرُمها ياشِيَن

وتدري النبي راعيها

موتعرف مصابه زين

للعتره وتعاديها

مرفوضة اصلن فتوتك

كل فتوى ماتنهانه

يحسين هاي مصيبتك

بيها الخلك حزنانه

................................

نفديله كلشي ومانظن

للزهره ونوافيها

هاي العزيزة امّ الحزن

بدموعِنا نواسيها

عدّى ومضى ذاك الزمن

والعَن مَنِ يعاديها

باقي صداها صرختك

مولاي انت ويانه

يحسين هاي مصيبتك

بيها الخلك حزنانه

بآلام تصرخ شيعتك

تبقى النجم بسمانه

,,,,,,,,,,,,,,,,,,,,,,,,,,,,,,,,

خادم اهل البيت ع

سعيد الفتلاوي الطويرجاوي




  • المصدر : http://www.kitabat.info/subject.php?id=11845
  • تاريخ إضافة الموضوع : 2011 / 12 / 03
  • تاريخ الطباعة : 2025 / 03 / 15